Lëvizja Rinore për Integrim është një forum rinor politik, i cili u themelua në 9 qershor të vitit 2004 nga një grup studentësh,mes të cilëve 5 vajza, të cilët shikonin te iniciativa e tyre shpresën për një Shqipëri më të mirë.

Ky forum u ngrit mbi vlera të forta të social-demokracisë si: liria, barazia, solidariteti,parime këto të sanksionuara edhe ne statutin e LRI sot .

Themelimi i LRI erdhi në një moment kur këmbana politike po tregonte domosdoshmërinë e zgjidhjeve të reja për të rinjtë, në mënyrë që ata ta shihnin veten pjesë integrale të politikës. Një forcë e re, me vizion dhe me mundësi reale përfaqësimi për të rinjtë, që do të ktheheshin në protagonistë të jetës politike. E krijuar modestisht në një moment kur forumet  e tjera politike ishin të konsoliduara, Lëvizja Rinore për Integrim fitoi kredo politike në sajë të korrektesës dhe vendosmërisë që tregoi për ti çuar deri në fund premtimet e saj, solidaritetit, frymës së grupit që treguan anëtarët e saj e që vazhdojnë ta trashëgojnë pasardhësit edhe në ditët e sotme.

Në 12 vite të ekzistencës së saj, LRI ka treguar  pjekuri politike nëpërmjet ngritjes se kauzave të rëndësishme dhe finalizimit të tyre në politika konkrete. Ky forum ka rritur përgjegjshmërinë, kulturën politike dhe të menduarit opozitar te të rinjtë, në raste cënimi të interesave të komunitetit ku jetojnë. Jo vetëm një akademi politike, por edhe një strehë për socializimin e të rinjve, të cilët i bashkojnë interesat kulturore, sportive e artistike. Axhenda e larmishme e LRI i mban anëtarët dhe simpatizantët e LRI të angazhuar përgjatë gjithë vitit.

Lëvizja Rinore për Integrim e bazon veprimtarinë politike mbi programin e saj.Përherë vigjilente për të pasur në fokus të saj problematikat e të rinjve shqiptarë, fusha dhe sektorë që paraqesin një ngërç për progresin e Shqipërisë dhe për aderimin e saj në familjen europiane.Duke e vlerësuar thelbësore rolin e edukimit në krijimin e një shoqërie sfiduese, Lëvizja Rinore për Integrim ka qënë zëri më i fortë i problematikave që prekin edukimin,si matura shtetërore, praktikat e punës, reforma në arsimin e lartë, infrastruktura shkollore.Forumi i LRI,me qëllim krijimin e një rinie solidare ka ndërmarrë nisma konkrete edhe për formalizimin dhe nxitjen e vullnetarizmit, nëpërmjet hartimit të ligjit për punën vullnetare, një kërkesë kjo e Bashkimit Europian. Jashtë vëmendjes së LRI nuk ka mbetur as zhvillimi i politikave mbrojtëse për mjedisin, trashëgiminë kulturore, promovimi i turizimit, te drejat e njeriut, pjesëmarrja sociale.

Lëvizja Rinore për Integrim ka marrëdhënie të shkëlqyera me forumet simotra në Europë e në botë dhë gjithmonë është kujdesur për të ndjekur axhendën ndërkombetare me qëllim ndikimin në politikat globale. Sot është anëtare me të drejta të plota në Internacionalen e të Rinjve Socialistë ( IUSY) dhe në Organizatën Europiane e të Rinjve Socialistë ( YES ), fal angazhimit të vazhdueshëm dhe përkushtimit maksimal të treguar për përfshirjen e të rinjve në politikbërje dhe realizimin e projekteve të përbashkëta. Bashkëpunimi i frytshëm dhe imazhi i mirë që LRI gëzon në arenën ndërkombëtare bën që LRI të jetë përherë në koherencë me forumet simotra në Europe e në Botë dhe avangarde ndaj forumeve në Shqipëri sa i përket mënyrës së organizimit, hartimit dhe implementimit të politikave rinore dhe funksionimit të brëndshëm.

Jetëshkrimi i këtij forumi pasurohet dita ditës fal energjisë, dashurisë dhe përkushtimit që të rinjtë e LRI  tregojnë në çdo aktivitet,në çdo ide të propozuar, sfidë që iu del përpara,duke i përballuar ato si një familje e madhe dhe duke dëshmuar vlerat që mbart një rini që përditë investon energjitë e saj drejt projektimit të një Shqipërie pozitive .